Notum sit omnibus Christi fidelibus tam modo viventibus quam post futuris, quod ego Berchtohus gratia dei Fuldensis abbas ex peti|cione Odalrici, pii abbatis de Cella beate Pauline consentiente Fuldensi ecclesia quendam viculum Gozelbrunnen | dictum per singulos annos tria talenta persolventem per manus Gozmari comitis advocati ecclesie nostre ad Cellam beate | Pauline ob honorem beate Marie virginis, que principalem locum in eadem cella tenet, contradidi et in concambium predicte villule in Clukowe et in Cursitz et Remede predia per singulos annos quinque talenta persolventia per manum Sizonis comitis advocati eorum in proprietatem ecclesie nostre recepi et consentientibus dominis illis, qui predictam villam a Fuldensi ecclesia in beneficium acceperant, predia illa quinque talenta persolventia pro commutatione ville quam prius habebant, que tria tantum talenta persolvebat, in beneficium illis prestiti sicque per gratiam dei Cellam beate Pauline a vexationibus, quas ob vicinitatem supra memorate ville patiebantur, liberavi et concambium inter nos factum scriptis roboravi. Acta sunt autem hec anno incarnationis domini millesimo centesimo tricesimo tercio, indictione undecima, et ut semper inconvulsa permaneant, sigillo sancti Bonifacii ea insingniri (!) precepi. Huius rei testes sunt Lodewicus regionarius comes, Ernest comes de Tunna, Lodewicus comes de Lara, Dietmarus de Rosla, Adalherus et Gerboto de Wiceleibe, Widelo de Grizheim, Sizo de Arnstete, Poppo de Steine, Lodewicus de Wangenheim et alii plurimi.