Iohannes de Gotha, canonicus ecclesie sancte Marie Erfordernis, iudex ab honorabili viro domino . . scolastico Nuenburgensi iudice a sede apostolica | delegato subdelegatus honorabilibus viris prepositis, viceprepositis, archipresbyteris, plebanis et vicariis universis per sancte Marie, sancti Severi | Iecheburgensis et Dorlonensis prepositurarum terminos constitutis sinceram in domino karitatem. Cum nos intellectis plenius et discussis me|ritis cause appellationis a dicto domino scolastico nobis commisse, quam appellationem honorabilis dominus B[ertoldus] abbas monasterii Celle Pauline contra Cunradum et Gerhardum fratres dictos de Seyn interposuerat, a domino Iohanne preposito ecclesie Wurcinensis, cui dictus scolasticus Nuenburgensis iudex a sede apostolica delegatus causam, que inter eos super quodam prato et medietate molendini sitis in Suabistorf vertebatur, primo subdelegaverat, diffinitam sibi sententiam reservata pronuntiaverimus iuris ordine in omnibus observato, dictum dominum abbatem iuste et legitime appellasse ac processu prefati Wurcinensis prepositi penitus revocato cassaverimus, inmo cassas et irritas nunctiaverimus suspensionis et excommunicationis sententias seu alias sententias quascunque, si quas idem prepositus contra abbatem vel ecclesiam suam post appellationem interpositam tulit de facto, discretioni vestre mandamus sub pena suspensionis, quam in vos proferimus in hiis scriptis, si mandatum nostrum neglexeritis adimplere, quatenus omnes sententias, quas sepedictus prepositus Wurcinensis contra memoratum abbatem vel suam ecclesiam promulgaverit, ipso iure nullas, cassas ac irritas et inanes in vestris ecclesiis publice nuncietis, mandata ipsius de cetero pro nullo reputantes, cum ab ipso in hac causa sit legittime appellatum, sicut coram nobis probatum et ostensum fuit legitimis documentis.