Nos Guntherus dei gratia comes iunior de Keverinberc, [Guntherus, Heinricus, Albertus, Heinricus, Albertus, Guntherus,] fratres et filii Guntheri bone | memorie comitis senioris de Keverinberc fratris nostri universis hanc litteram inspecturis salutem cum affectu sincero. Ad pre|sencium certitudinem et futurorum memoriam volumus | pervenire hac littera et testimonio subscriptorum testium publice profitendo, quod bona deliberatione prehabita et de | maturo consilio discretorum virorum militum nostrorum peticioni fidelis | nostri Friderici militis de Wizzeleibin annuentes super bonis nostris in Libergin maiori sitis, XIII videlicet | mansis et dimidio, cum omnibus attinenciis tam in villa quam extra villam, quos idem F[ridericus] a nobis titulo feodali tenebat, cum domino Bertoldo abbate et conventu Celle domine Pauline super bonis ipsorum in Kirchem sitis, allodio scilicet et omnibus attinenciis tam in campo quam in villa concambium seu permutationem voluntariam fecimus, dictus vero F[ridericus] de Wizzeleibin prescripta bona in Libergin ad manus nostras et Guntheri comitis de Swarzburc libere et absolute resignavit ac domino abbati Ber[toldo] necnon conventui supradicto de consilio suorum amicorum in valore preponderationis bonorum in Kirchem L marcas vel centum talenta et quinque super addidit et sic a nobis allodium in Kirchem cum omnibus attinenciis et a comite G. de Swarzburc loco prescriptorum bonorum in Libergin iure feodali recepit. Nos vero e converso et filii fratris nostri pie memorie comitis G[untheri] prefati bona nostra sepedicta in Libergin XIII mansos et dimidium domino Ber[toldo] abbati et conventui Celle predicte de consensu concordi et bona voluntate nostri omniumque heredum nostrorum presencium et futurorum dedimus pleno iure omnemque censum et ius, quod ibidem in hominibus propriis feodetariis alteriusve cuiuscunque condicionis in curiis, domibus, ortis et areis, item prata, rubetum, pascua, silvas et generaliter omnia bona cuiuscunque census, iuris, servitutis vel alterius conditionis, que tam in ipsa villa Liber[gin] quam in campo ibidem in prediis rusticis cum omni iure proprietatis attinenciis, fructu, proventu, utilitate, cultis et colendis nichil expresse vel tacite excipientes dinoscimur habuisse. Predictum quoque dominum abbatem et conventum misimus in corporalem possessionem dictorum bonorum in Libergin transferentes in ipsos omne ius et dominium, quod nobis conpetebat in ipsis, ita quod de bonis eisdem facere possunt dando, vendendo, permutando seu quovis alio modo quicquid ipsorum placuit voluntati, tradentes omnia bona et iura in precedentibus generaliter specialiterque expressa sine omni werra seu litigio et quod volgariter dicitur ansprache abbati et conventui perpetuo et quiete possidenda. Renunciamus nichilominus omni iuri advocacie, peticioni generali seu communi, angariis, actionibus nobis nunc vel inposterum conpetentibus sive exceptioni si quae in contrarium occasione vel necessitate conpetere nobis possent et litteris in contrarium impetratis seu postmodum impetrandis, promittentes et nichilominus obligantes nos fideliter in his scriptis super iusta et indempni warandia facienda siquid de bonis sepefatis, quod absit, litis seu nociture forsitan in posterum emergeret questionis. Ut autem hec nostra permutatio ac donatio permaneat inconcussa et robur obtineat perpetue firmitatis, presentes litteras sigillis nostris appendentibus dedimus fideliter roboratas. Testes vero huius concambii seu permutationis sunt: dominus Andreas abbas sancti Petri in Erfordia, dominus Theodericus abbas Saluendensis, dominus Ekkehardus decanus sancte Marie Erfordensis, dominus Kunemundus cantor ibidem, dominus Heinricus scolasticus eiusdem ecclesie, dictus de Lapide, dominus Ludewicus de Degenstete canonicus Nuwenburgensis, dominus Hartungus Brunonis canonicus sancti Severi, dominus Heinricus miles de Degenstete, dominus Berngerus de Meldingin, Albertus de Elchilebin, Ulricus de Elchilebin, Fridericus de Angilrode milites et alii quam plures fide digni.