Conradus dei gratia Cycensis ecclesie decanus, iudex inter partes infra scriptas a sede apostolica | delegatus, viris discretis dominis . . in Scharfphelo et in Izloyben plebanis seu eorum | vices gerentibus salutem in domino et mandatis apostolicis firmiter obedire. Quia Abraham, Brende|chen, Sampson et Matheus Iudei fratres commorantes in parochiis vestris terminum, videlicet quintam feriam post purificacionem beate virginis, quem ipsis assignavimus peremptorie ad excipiendum in causa domini . . abbatis Celle domine Pauline contra personas seu contra dicta testium productorum, non observaverunt nec aliquem pro se procuratorem miserunt, habito super eo consilio discretorum conclusimus in causa et dictos Iudeos contumaces iudicare possemus, tamen ipsis ex superhabundanti parcere volentes vobis mandamus auctoritate qua fungimur sub pena excommunicationis, quam in vos in hiis scriptis ferimus, si non adimpleveritis nostrum mandatum, immo verius apostolicum, quatinus predictos Iudeos Abraham, Brendechen, Sampsonem et Matheum citetis, ut in ambitu ecclesie nostre in quarta feria post dominicam Reminiscere peremptorie compareant ad audiendum diffinitivam sentenciam in dicta causa, quam feremus etiam ipsorum absencia non obstante et in causa procedemus, prout postulat ordo iuris. In Signum execucionis huius mandati nobis hanc literam reddite signatam aliquo intersigno.