Nos Otto, dei gratia abbas monasterii Salueldensis, ordinis sancti Benedicti, publice recognoscimus ac omnibus presens scriptum visuris ac audituris cupimus fore notum, quod anno | domini MCCCXXV, in vigilia beatorum Petri et Pauli apostolorum, constitutus in nostra presencia et eciam plurimorum fide dignorum honorabilis vir dominus Theodericus abbas Celle domine Pauline, | ordinis sancti Benedicti, et quoddam privilegium cum duobus pendentibus sigillis virorum subscriptorum sigillatum obtulit coram nobis et exhibuit ac eciam legi fecit, tenoris et continentie per omnia de verbo ad verbum scriptum in hunc modum:
"Nos Hermannus dominus castrensis in Cranichfelt et Sophia eius legittima recognoscimus et ad notitiam omnium et singulorum, ad quos presentes pervenerint, cupimus pervenire, quod diligenti tractatu nobiscum et cum nostris prehabito legittima necessitate urgente ad cavendum gravibus dampnis, que nostris debitis per usuras accreverunt et accrescere potuerunt, propter nostrum melius honorabilibus et religiosis viris domino . . abbati et conventui ecclesie Celle beate Pauline, ordinis sancti Benedicti, bona nostra, videlicet quatuor mansos cum dimidio, quartam partem aree, que dicitur borgstadel, quartam partem pomerii, sita in campis et villa ville Elcheleybin cum pascuis, pratis, piscariis, salictis, reditibus, obvencionibus et omnibus aliis iuribus et utilitatibus ac pertinenciis, prout nos pro bonis propriis possedimus et nostri progenitores usque ad hec tempora pacifice et quiete, de consensu omnium nostrorum heredum et voluntate mera necnon etiam omnium aliorum, quorum interesse poterit, de iure vel de facto accedente expresso consensu vendidimus et tradidimus iusto vendicionis titulo pro octoginta et duabus marcis cum dimidia argenti Fribergensis nobis integre et utiliter persolutis titulo et iure proprietatis perpetuo possidendum, ita quod eciam quarta pars iuris patronatus ecclesie predicte ville in Elcheleibin libere transeat cum bonis predictis, prout ad nos spectabat, ad eosdem, in quorum quidem bonorum eosdem suo et ecclesie eorum nomine misimus et induximus possessionem corporalem et iurium simul eorundem, promittentes nostro et heredum nostrorum seu successorum nostrorum nomine et pro ipsis prefatum - abbatem et conventum et eorum ecclesiam eorum de ipsis bonis predictis et omnibus aliis bonis, que ibidem possedimus et iurium suorum quibuscunque tanquam de bonis propriis iusticialiter perpetuo guwarandare et ab impugnacione qualibus reddere liberos et indempnes, renunciantes insuper nomine, quo supra, omni actioni doli mali, actioni in factum ex iusta causa vel iniusta, decepcioni, excepcioni iuris canonici vel civilis, graciis, concessionibus, privilegiis inpetratis seu inpetrandis, datis vel dandis, iuri dicenti renuntiacionem generalem non valere, restitucioni in integrum et quibuslibet iuris auxiliis, per quas seu per que dictus contractus, venditio, sive empcio, ut premittitur, posset aliqualiter infirmari vel infringi. In cuius rei evidenciam et testimonium sigillo nostro una cum sigillo honorabilium virorum dominorum . . officialium prepositure ecclesie sancte Marie Erfordensis presentem paginam dedimus roboratam. Nos quoque Rudolfus decanus et Theodericus de Myla canonicus et officiales prepositure ecclesie predicte recognoscimus, quod predicta omnia et singula coram nobis publice recognovit et sigillum nostre officialitatis una cum sigillo suo proprio appendi procuravit. Testes sunt huius rei dominus Theodericus de Witzeleibin plebanus in Grabin, quondam abbas in Saluelt, dominus Bertholdus de Kyrspeleybin, quondam abbas ecclesie Celle predicte, dominus Albero monachus ibidem, dominus Heinricus dictus Stal, plebanus in Cranichfeilt, dominus Heinricus de Witzeleibin plebanus in Alkesleybin, dominus Vlricus plebanus in Barchfeilt, Hermannus de Lewenstein et Heinricus dictus Rolle milites, Heinricus de Meyldingen, Fridericus Herborto et Theodericus fratres de Wiczeleibin, Heynricus de Meyldingen et quam plures alii fide digni."
Et nos Otto, dei gratia abbas predictus, presens transscriptum ad rogatum domini abbatis Celle Pauline predicti ac eciam in testimonium omnium et singulorum premissorum sigillo nostro fecimus ex certa sciencia firmiter roborari. Datum ut supra.