Wir Gunther von gotis gnadin apt zcu der Paulin Celle bekennen uffenlichen an dysme | keynwerdigen briefe und tun kunt allen den, dy en sin, horn odir lesin, daz dy bescheyden lute | her Heynrich der prister und Gunther sin bruder, Gunthers kint, von Bechstete, dem goth gnade, | met gutir vorbedechtikeyt und met gantzme willen vorkouft habin recht und redelichen den geystlichin hern unsin hern hern Hartung dem prior und der sammenunge gemeyn uns vorgenanten closters zcwene schillinge pheyng geyldis und eyn hun von eyme garten zcu Rotenbeche, den gebyt Tycel Somer, eyn Schilling pheynge, zcwey hunre und eyn halbmaz havern, den zcins gybyt Wetele von eyme hofe und garten, der da gelen ist in dem dorf zcu Aldendorf, ierlichs zcins alle iar zcu gebene uf sente Michels tag met allen rechten, eren und nutzcen ewiclichen zcu habene und zcu besyczcene, also se und er vor varen dy gud und den zcins von uns und unsme gotshus gehad und beseszen haben, umme zcwey phunt pheynge und vier Schillinge, dy se en gutlichin und genczlichin bezcald haben. Och haben dy vorgenanten vor koufere her Heynrich und Gunther sin bruder vor sich und alle er erben vor uns vor zcegen der gud und der zcinse an allirleyge hindernysse und argelist, da von der kouft und dy gud gehindert mochten werde und han dez unsin hern getan eyne rechte were. Dez sint ge|[zcuge], her Heynrich Kelbelin unse monch, Conrad Hetzcel von Kongysse und Nyclaus Belschyber von Rotenbech unse diner. Daz alle dese ding stete, gantz und unvorruckyt blyben, habe wir vorgenante apt Gunther dorch bete willen der vorgenanten vorkoufere und unsir hern unse insigil an desen brief gehenget.