Wir Iohannes von gotis gnaden apt des gestiftis sancte Pauline Celle unde dy gancze | samenunghe gemeynlichen des selben clostirs bekennen unnd thun kunt vor uns unde vor allen | unse nachkomen ewiclichen, daz uns dy edeln herren grave Heynrich unnd grave Gunther, | gebrudire, graven von Swarczburg, herren zcu Sundirshusen und zcu Blanckenberg, unser liben gnedigen herren oren selin zcu troste unnd zcu selekeit gefriget unnd ewiclichen geeigent habin zcwene ackire unnd eyn virteil winwachs zcu Blanckenberg zcu dem Hofelin gelegen by unses gotzhus keltern dy wingarten wir von leiden gemacht haben unnd dy leiden in Petir Capphus gut gehort haben unnd von unsem gotzhus zcu lene ghen. Dyselben wingarten haben uns dy egnantin unse gnedigen herren von orre und von alle orre erben unnd nachkomlinge weghen gefriged unnd geeigent von allem geschosse, bate unnd von allir beswerunghe unnd gedrengnisse daz wir unnd unse clostir dy obgenanten wingarten besycze sullen, also fry eygins recht unnd gewonheit ist ewiclichen, usgeslossen unnd unbeschediget alle gerichte der egnanten heren und orre erben unnd obir hals unnd obir hant. Dar umme haben wir egnantir apt unnd dy gancze samenunghe des egnanten clostirs den egnanten unsen gnedigen herrn gegeben unnd wol bezcalt funf schog gutir missener grossen. Czu warme orkunde unnd sichirheit haben wir unser aptige unnd unsir samenunghe insegil wissentlichen an desen offen briff gehengit.