Wir Iohans von gotis gnadin apt des stifftis czu der Celle bekennen ofiinlichin mid disßem | brive, daz unser liber getruwer Friczen von Angelrode mid unßme wisßen und guten willen | hat bewiset gemacht und gegebin Alheyden von Angelrode siner elichin wirthin czu eyme | rechtim lypgedinge und dy wile sy lebet czwey teyl czu Ditherichewinden agkir, wesyn und holcz und daz schultheyzin annrecht dar ober mid allen nuczen, eren, fryheytin und rechtin, als her dy vorgenanthen guthe, agkir, wesin und holcz mid deme schultheyzin annrecht byz her had bracht und besesßin und alse genczlich darczu gehoret irsucht und unirsucht nichtes uzgnomen. Dy vorgenanthin guthe mid allin yren czugehordin von uns und unßme stiffte czu rechteme erbelehen ruren und uns alle jerlich da vone vier und czwenczig schillinge phenge czu erbe czinse in unser kammer gefellit, had uns Fricze egenantir flizig und fruntlichin gebetin, daz wir der egenanthin guthe Alheydin siner wirthin egenantir bekennen und ir dy lyhen czu rechtime lypgedinge. Des haben wir dorch solcher fliziger bethe willin der obgenanthen Alheydin der vorgenantin guthe mid allin vorbeschribin rechtin czu rechtim lypgedinge czu yrme lybe als wir von rechte sollin und mogin bekand und gelegin und lyen und bekennen mid orkunde disßes kenwerdigin brieffes da robyr ouch dy vorgnante Alheyd czu vormundin gnomen hat dy vestyn unser libin getruwin und besundern ern Hartmanne von Lengefelt ritter, Heynriche Schykin und Heynriche von Gryzheym und ob dy nicht en werin, so solde und mochte sy andere vormundin kysen, dy sy beduchte yre nucze syn, dy sy ouch darczu feystlich schyrmen und vortedingin sollin wanne und wydigke yr des nod ist. Des czu orkunde habin wir unser insegel an disßin brieff l[a]sßin hengin.