Wir Gunther von gotis gnaden apt in sente Paulinen Zcelle mit allen unsern nachkvmelingen bekennen offelich an diseme | brife vor alle den, di en sehn, horen oder lesin, daz Hannes vorn Zcisen börger zcu Blankenberg mit gutem vorbedachtem mute und | willen alle siner erben recht und redelichen vorkouft hat ern Petere von Erforte unserm metebruder dise nachgeschreben zcinse unde gut | gelegen zcu deme Höfilin. Sunderlich Ditterich Kremer sal geben ierlichen siben unde zcwentzik schillinge phenninge zcinses van sechs ackern ardlandis van eynem ackere wisin unde van eyme ackere holzces, Reynhart Gans unde Conrad Nuz geben vir unde zcwentzik schillinge phenninge zcinses van zcwolf ackern ardlandis gelegen zcu Nuwendorf. Den selben gnanten zcins sullen di vorgnanten zcinslute unde ire erben oder wer daz selbe gnante gut unde erbe innehat ierlichen reychen unde geben in di vorgnanten Zcelle zcu deme nuwen altare sente Elsebethen, den der gnante er Peter hat gelazen machen und wedemen zcu eyme ewigen gedechtenisse unde selgerethe siner sele, alle siner altfordern sele zcu troste unde allen gelobigen seln. Den habe wir dar zcu geeygent unde williclich gewidemet ewiclich an alle argelist unde ane geferde. Den selben gnanten zcins hat der vorgnante er Peter redelich gekouft vor drizcik phunt guter genger phenninge unde vor eynen virdunk, di er nutzlichen unde gentzlichen bezcalt hat und vorgolden. Alle der vorgeschreben sache unde artikel zcu eynen gantzen orkunde unde Sicherheit habe wir unsir insigel wizzentlichen gelazen hengen an disen offen brif und dar über gegeben.