Wir Gunther van gotis gnaden apt in sente Paulinen Zcelle bekennen offelich an disem geynwertigen offe brife, | daz er Peter van Erforte unse getruwe geystliche mite bruder recht unde redelichen gekouft hat mit unserme guten | willen, geheyze unde vorhenkenisse funftehalben unde zcwentzik schillinge phenninge genger unde gebir ierliches zcinses | van disen nach geschreben guten unde erbe gelegen under des goteshuses wingarten in der flure zcu Blankenberg, daz van uns get van gotis gnaden zcu lenhne. Den selben zcins hat der egnante er Peter zcu Conraden Gotzen gekouft unde dise lute sullen di den selben gnanten zcins ierlichen reychen unde bezeale sullen unde ire erben oder wer daz nach geschrebene gut innehat alle zcit offe sente Michils tag in daz unse gnante kloster an allez hindernisse als zcinses recht ist. Conrad Bitterolf gibet funftehalben schilling phenninge van drien virteyln wingarten, Thiterich Decker sechs Schillinge phenninge van eynem acker wingarten unde hoppfgarten, Heynrich Decker sechs Schillinge ouch van eynem acker, Herman Vorster zcwene Schillinge van eynem halber acker, Gunther Remder dri schillinge van eyme halben acker unde Conrad Schrotan dri schillinge van eyme halben acker. Den selben gnanten zcins unde erbe habe wir mit gutem willen geeygent unde eygen daz ewiclichen zcugefallenen zcu deme nuwen altare des egnanten ern Peters an allez hinderniss unde ane geferde. Des zcu eynre meren sichirheyt, orkunde unde bekentenisse habe wir unsir insigil wizzenntlich an disen offen brif lazen hengen unde dar uber gegeben.