Wir Gunther vorm thore, Gernad Grawe, Gunther Fleyshacke unde Berld Heczel, yczunt eyn syczende | rad zcu Kongisse, unde Hannis Nubecke, yczunt richter da selbins, bekennen alle eyntrechtlichen vor uns | und vor alle unse nachkamen mit desem uffen briffe unde wollen, daz is wissentlichen sy allen den, dy on | sehen odir horen leßen, daz vor uns gewest synt Berthold Cranolt unde Kunne syn eliche wertin unde habin bekant unde uns kunt getan, daz der erwerdige in gote herre unde vatir er Iohannis abt des gestiftes sentte Paulinen Zcelle unde Iohannis Hochercze, syns brudir son, on genczlichen unde wol bezcalt haben daz eegelt, daz sue on vor eyne gnuge gelobit hatten, also daz der briff uswist, den su obir dy fruntschaft uf beide partige gegebin habin unde was orre beidir frunt zcwißen on geteidigit unde gereid haben, genczlichen gericht unde volzcogen haben, daz on wol gnugit. Unde dar obir habin dy egnanten er Iohannis abt unde Iohannis Hochercze, syns brudir son, on sundirlichen yn fruntschaft an gereitem gelde gegeben funf unde zcwenczig phunt gutir volgengir phennige. Ouch bekennen wir obgnanten ratismeistere unde richter, daz dy gnanten Berlt Cranolt unde Kunne syn eliche wertin vor gerichte gewest sint unde sich oris vatirlichin anfallis nicht andirs vorzcogen habin, wan nach uswisunge des briffes, den ore beide frunt dar obir gegebin habin, der da vor gerichte gewist wart. Czu orkunde unde warme bekentnisse desir hy vor unde nach beschrebin rede unde artikel desis briffes des habin wir obgnanten ratismeistere unde richter unsir stad ynsegil durch bete willen des obgnanten Berldes unde Kunnen syner elichen wertin an desen uffen briff gehengit.