Wir apt Conrad von Ischirstet von gotz gnadin der Cellen Paulin, her Gunthir Vocke prior unde dy gancze | sammenunge gemeyniclich des selbin clostirs bekennen uffinlich an dissem geynwertigen briffe allen den, dy | en sehen, horen odir lesin, daz her Iohannes Hochhercze unsir clostirbrudir unde Henrich Henning unsir kelnner | gekouft habin recht unde redelich dertehalbin ackir leydin, dy da gelegin sint zu deme Houeln by unsme keltir zu Petir Kapphüs gessessin zu Czegerim unde zu alle sinen erbin ewiclichen ume achte phunt phenninge gutir phenninge gengir unde gebir uz deme gute, daz von unsme goczhus zu lene geyd, also daz sye dy gute sollen inne habin vrie unde ledig unde ane czinse zu er beydir lybe unde an allerley hindirniße unde an alles geverde. Ouch thuen wir den vorgenanten koufern dy gunst unde frunschaft, daz sye uz den vorgenanten dertehalbin ackirn leydin eynen wingartin mogin machin, so sye beste mogin. Ouch bekennen wir apt egenantir unde dy gancze sammenunge, daz wir hern Iohannes Hochhercze unde Henriche Henninge egenanten dy gunst getan habin, ob er eyn abeginge von todis wegin, des god nicht en wolle, so schal der obgenante wingarte gancz von er eyme uffe den andirn gevalle an allerleye widirsproche unde hindirnisse unde geverde. Ouch wanne sye beyde vorscheydin sint von todis wegin, so schal der egenante wingarte gevallen uffe unsir goczhus. Ouch bekennen wir apt unde sammenunge egenantin, ob her Iohannes unde Henrich obgenantin in den egenantin wingartin gesprochin worde von geschosses wegin odir von lantbete wegin odir von andir sache, des sollen wir sye vorteydingin, so wy beste mogin. Daz alle disse vorgescrebin rede, stucke unde artikil stete unde gancz gehaldin werdin, des habin wir apt Conrad egenantir unde unse sammenunge unsir beydir ingesigil an dissen uffin briff gehangin.