Wir Gunther von gotis gnaden apt in sente Paulinen Zcelle mit allen unsern nachkumelingen bekennen offelich | an diseme geynwertigen brife vor alle den, di in sehn oder horen leesin, daz er Peter van Erforte, unse getruwe geystliche | mete bruder, recht unde redelichen gekouft hat zcu Albrechte van Göls, borger zcu Blankenberg, unde zcu sinen erben wizzentlich | virzcehn schillinge phennink geldis ierliches zcinses an disen nachgeschrebin luten unde gute. Nycklawis Mezzerer gibit sechstehalben schilling phenninge ierlichen van drien virteyln hopfgarten gelegen vor deme Hayn, Thizcel, Hesin Otten san, dri schillinge unde eynen phenning van anderhalbeme virteyle hopfgarten gelegen ouch vor deme Hayn, Ffritsche Robin dirtehalben Schilling van eyme halben acker hopfgarten vor dem Hayn und Heynrich Kylhower dri schillinge ane eynen phenning van eyme halben acker hopfgarten, ouch gelegen vor dem Hayn. Den selben vorgnanten zcins sullen di gnanten zcinslute unde ire erben oder wer daz vorgnante erbe inne hat ierlichen bezcalen deme egnanten ern Petere in daz egnante unse kloster zcu deme ewigen lichte vor deme heyigen cruzce alle zcit offe sente Michils tag an allez geferde. Zcu deme selben ewigen lichte habe wir den gnanten zcins gewidemit unde gentzlich mit allen rechten ewiclich geeygent wizzentlich unde williclich an alle argelist. Des zcu eynem warn bekentenisse unde orkunde habe wir unsir insigil an disen offen brif gehenget.