Raimundus miseratione divina sacrosancte romane ecclesie et sancte Marie nove presbyter cardinalis Gurcensis ad universam Germaniam, Daciam, Sueciam, Norwegiam, Frisiam, Prussiam | omnesque et singulas illarum provincias, civitates, terras et loca etiam sacro romano imperio in ipsa Germania subiecta ac eis adiacentia, apostolice sedis de latere legatus, dilecto | nobis in Christo abbati Celle Pauline ordinis sancti Benedicti Maguntine dioceseos salutem in domino. Solet sancta mater ecclesia erga filios, qui post lapsum cum humilitate ad eam redeunt, | propiciam se exhibere et benignam eorumque statui salubriter consulere, prout temporum et personarum qualitate pensata conspicit expedire. Sane pro parte Heinrici ex comitibus in Swartzburg canonici Argentini nobis nuper exhibita petitio continebat, quod cum alias ipse causante antiquo humani generis hoste in quosdam clericos et presbyteros, prout a nonnullis asseritur, manus violentes iniecerit et eis ac nonnullis aliis laicis multa mobilia bona ipsis invitis asportaverit et in suos malos usus converterit aliasque et alia fecerit et perpetraverit, propter que, si quis suadente diabulo et aliorum canonum penas serias et censuras et irregularitatis maculam incurrisse et se contraxisse timeat. Et sicut eadem subiungebat petitio, dictus Heinricus de premissis cum proposito satisfaciendi lesis et injuriatis predictis ab intimis doleat cupiatque ad sancte matris ecclesie gremium redire. Quare pro parte sua nobis fuit humiliter supplicatus, quatenus ei, qui etiam in subdiaconatus ordine constitutus existit, de oportune absolutionis beneficio provideri, quecunque ut in susceptis ordinibus ministrare ac canonicatum et prebendam predictos nec non preposituram collegiate ecclesie in Iechenburg, Maguntine dioceseos, quorum insimul fructus, redditus et proventus decem marcharum argenti secundum communem extimationem valorem annuum non excedunt, quos inter cetera obtinet, necnon quecunque alia invicem et cum eisdem beneficiis obtentis se compacientia beneficia ecclesiastica recipere et quoad vixerit similiter retinere possit et valeat, auctoritate nostre legationis misericorditer dispensare dignaremur. Nos igitur, qui cunctorum Christi fldelium salutem ferventer desideramus, dicti Heinrici supplicationibus in hac parte inclinati, cum de premissis certam noticiam non habeamus, discretioni tue dicta auctoritate nostre legationis qua fungimur in hac parte tenore presentium committimus et mandamus, quatenus vocatis dictis clericis et presbyteris lesis ac aliis, qui fuerint evocandi de premissis, te diligenter informes et, si ea vera esse compereris, dictum Heinricum, postquam lesis predictis de iniuriis illatis et dampnis datis realiter et cum effectu satisfecerit et absolutionis beneficium sibi impendi humiliter petierit, ab omnibus et singulis penis suis et censuris, quas premissorum occasione incurrerit, accepto tamen ab illo corporali juramento de stando iuri ac sancte matris ecclesie nostrisque et tuis parendo mandatis hac vice dumtaxat absolvas in forma ecclesie consueta injunctis sibi pro modo culpe penitencia salutari et aliis, que de jure fuerint injungenda, et demum cum eodeni Heinrico quibusdam premissis non obstantibus in susceptis ordinibus ministrare ac dicta obtenta retinere necnon alia quecunque beneficia ecclesiastica, que sibi in posterum canonice conferri contigerit, recipere et similiter retinere, quoad vixerit libere et licite possit et valeat, si aliud canonicum non obstiterit, dicta auctoritate dispenses non obstantibus constitutionibus et ordinationibus in sinodalibus seu provincialibus editis conciliis generalibus vel specialibus ceterisque contrariis quibuscumque. In quorum fidem presentes literas fieri nostrique sigilli jussimus appensione communiri.