Bonifacius episcopus servus servorum dei dilecto filio . . decano ecclesie Nuemburgensis salutem et apostolicam benedictionem. Sub religio|nis habitu vacantibus pie vite studio ita debemus esse propitii, ut in divinis beneplacitis exequendis malignorum non possint obstaculis | impediri. Cum igitur dilecti filii . . abbas et conventus monasterii Celle Pauline, ordinis sancti Benedicti, Maguntine dioceseos, a nonnul|lis, qui nomen domini recipere in vacuum non formidant, prout accepimus, multiplices patiantur iniurias et iacturas, nos volentes eorundem abbatis et conventus providere quieti et malignantium malitiis obviare discretioni tue per apostolica scripta mandamus, quatinus dictis abbati et conventui efficaciter presidio defensionis assistens non permittas eos contra indulta privilegiorum sedis apostolice ab aliquibus indebite molestari molestatores huiusmodi per censuram ecclesiasticam appellatione postposita compescendo, attentius provisurus, ne de hiis, super quibus lis est forte iam mota vel que cause cognitionem exigunt et que indulta huiusmodi non contingunt, te aliquatenus intromittas nec in episcopos aliosve superiores prelatos excommunicationis vel suspensionis aut in universitatem aliquam interdicti sententias promulgare presumas et ne aliquis auctoritate presentium extra suam civitatem et diocesin evocetur nec procedatur in aliquo contra eum. Nos enim, si secus presumpseris, tam presentes litteras quam etiam processum, quem per te illarum auctoritate haberi contigerit, omnino carere iuribus et nullius fore decernimus firmitatis. Huiusmodi ergo mandatum nostrum sic prudenter et fideliter exequaris, ut eius fines quomodolibet non excedas, presentibus post triennium minime valituris.