| In nomine sancte et individue trinitatis. | Notum sit omnibus Christi fidelibus tam presentibus quam futuris, quod | ego Gebehardus dei gratia abbas tercius in Cella domne Pauline duos mansos adquisierim vi|ginti et octo solidos annuatim persolventes in villa, que dicitur Nabvinede, duodecim talentorum | coemptione toto quidem conventu assentiente a domina Gesila de VViccheleiben et a duobus filiis eius, Heinrico videlicet et Ottone. Id autem ea provisione eoque tenore actum est, ut quivis horum trium solutis quandoque duodecim talentis eosdem mansos libere a nobis suscipiat sibique absque calumnia omnique contradictione iure hereditario ut prius possideat. Si vero isti tres, mater scilicet cum duobus filiis, ab humanis rebus ablati nature concesserint, ecclesia nostra prefatos mansos, quos in vita sua exfestucaverant ante altare beate Marie virginis presentibus tam monachis quam liberis atque ministerialibus comitis Heinrici, cum omnibus appendiciis suis absolute optineat neque cuiquam de parentela eorum ulterius reclamare seu redimere liceat. Huius igitur rei testes sunt: Wolfer de Cranechfelt, Luitger frater eius de Chircheim, Heinric de Elcheleiben, Adeler de Arnestete, Bertold de Chindehusin, Ulric de Elcheleiben, Warnerus et Witilo frater eius de Winriseleiben et alii quam plurimi.