Benedictus episcopus servus servorum dei dilecto filio . . decano ecclesie sancte crucis Northusensis, Maguntinensis dioceseos, salutem et apostolicam benedictionem. | Pium esse dinoscitur, ut gloriantibus in malicia per nos taliter obsistatur, quod repressis eorum insultibus vacantes divino cultui | liberius possint in observantia mandatorum domini gloriari. Cum itaque dilecti filii . . abbas et conventus monasterii Celle domine | Pauline, ordinis sancti Benedicti, Maguntinensis dioceseos, a nonnullis, qui nomen domini in vacuum recipere non formidant, gravibus sicut asserunt affligantur iniuriis et iacturis, nos eorundem abbatis et conventus providere quieti et malignantium maliciis obviare volentes discretioni tue per apostolica scripta mandamus, quatinus dictis abbati et conventui contra predonum, raptorum et invasorum audaciam efficacis presidio defensionis assistens non permittas, eos in personis et bonis suis a talibus molestari, molestatores huiusmodi per censuram ecclesiasticam appellatione postposita compescendo, attentius provisurus, ne de hiis, super quibus lis est forsan iam mota vel que cause cognitionem exigunt aut que personas et bona non contingunt ipsorum, te aliquatenus intromittas nec in episcopos aliosve superiores prelatos excommunicationis vel suspensionis aut in universitatem aliquam seu collegium interdicti sententias promulgare presumas. Nos enim, si secus presumpseris, tam presentes litteras, quam etiam processum, quem per te illarum auctoritate haberi contigerit, omnino carere iuribus ac nullius fore decernimus firmitatis. Huiusmodi ergo mandatum nostrum sic prudenter et fideliter exequaris, quod eius fines quomodolibet non excedas, presentibus post triennium minime valituris.