Wir Wilhelm von gotes gnadenn hertzog zcu Sachsen, lanndgrave Indoringen und marcgrave zcu Miessen bekennen uffintlich an diesem
brive fur uns, unnser erbin, erbnemen und nachkomen und thun kund allermeniglich , das die edeln wolgebornnen her Heinrich grave zcu Swarczpurg, herre zcu Arnstet
und Sundershusen, her Heinrich grave und herre zcu Stalberg und Wernigerode und her Ernst grave von Haynstein, herre zcu Lare und Clettenberg von sinen und
graven Hannses von Hoynstein, graven Ernsts seligen sons sins vettern wegen unnser gevatter heimlichen und lieben getruwen fur uns komen sind demutiglichin
bittinde, das wir sie und yre libeslehinserben mit diesen hernachgeschriben slossen, steten, durffern, lehenen und gutern und yren zcugehorungen, so die yre eldern seligen
und sie von den hochgebornnen fursten hern Friderichen landgraven Indoringen und marctgraven zcu Miessen, unnserm lieben vettern seligen, auch hern Friderichenn
hertzogen zcu Sachsen et cetera, unnserm lieben bruder und uns in gesampten lehin gehabt und herbracht haben: Als nemlich mit den slossen und steten Lare, Hottinrode, Elrich,
Badungen und Blichenrode und iglichen yren zcugehorungen, so die genanten von Swarczpurg und Stalberg mit den herren von Hoynstein vorgenand; auch mit Rebeningen,
Rossla und Ebersperg und allen yren zcugehorungen, als die der von Swarczpurg und die von Hoynstein vorgenant mit graven Heinrichen von Stalberg und mit den
sloßen und stad Arnsperg, Clingen und Grußen und yren zcugehorungen die der von Stalberg und die von Hoynstein mit dem von Swarczpurg vorgenant in gesampten
lehin haben, auch semptlich zcu belehenen und yn die zcu gesampten lehen zcu lihen gnediclich geruchten. Habin wir angesehin mogelichkeid yrer bete auch willige
getruwe und anneme dinste, die yr aller eldern und sie unnsern eldern und vettern seligen, unnserm bruder und uns zcu ufftmaln unverdroßin und zcu dancke getan haben,
sie tegelichs thun und in zcukunfft thun sullen und mogen. Und dorummb die vorgenannten graven Heinrichen von Swarczpurg, graven Heinrichen von Stalberg, graven
Ernsten und graven Hannsen von Hoynstein gevettern und yrer aller libeslehinserben mit den vorgenanten slossen, steten, dorffern, lehen und gutern mit allen und iglichen
Lehenen, geistlichen und wertlichen gerichten, geleyten, zcollen, wiltpennen, friheidten, wonnen, weyden, wassern und allen andern zcu und ingehorungen gesucht und ungesucht
wie das alles genand ist, nichts ußgenomen zcu rechten gesampten lehin gnediclich gereicht und gelihenn alsvil wir durch recht doran zcuverlihen habin, reichen und lihen
ynach die also zcu rechten gesampten lehin als gesampter lehin recht und gewonheid ist, gennvertiglich in und mit crafft dieses brives. Also weres das grave Ernst
und grave Hanns von Haynstein vorgenant beyde an libeslehinserben mit tode verfilen, so sollten die sloss, stete und dorffer Lare, Hotenrode, Elrich, Badungen und Blichenrode
mit allen und iglichen yren zcugehorungen nichts ußgesloßin uff graven Heinrich von Swarczpurg, uff graven Heinrichen von Stalberg und yre libeslehinserben
komen und gefallen. Ginge aber grave Heinrich von Stalberg abe on libeslehinserbenn, so solten Rebenyngen, Roßla und Ebersperg mit allen und iglichen yren zcuge-
horungen an graven Heinrichen von Swarczpurg und an die von Hoynstein vorgenand und yre libeslehinserben komen und gefallen. Deßglichen widerumb ob
gescheh das grave Heinrich von Swarczpurg on libeslehinserben mit tode abginge, so solten die sloss und stad Arnsperg, Grußin und Clingen mit allen und iglichen
yren zcugehorungen an graven Heinrichen von Stalberg und die von Hoynstein vorgenant und yre libeslehinserben komen und gefallin und sullen die obgenanten
graven von Swarczpurg, Stalberg und Hoynstein und yre libeslehinserben alle und igliche obgeschriben sloss, stete, dorffer und yre zcugehorunge nichts usgesloßin
wie vorgemeldt ist furdmer von uns und unnsern erben zcu rechten gesampten lehin vorgerurtermaße von eym teyl uff die andern zcu gefallen, innhaben, besitzenn,
gebruchin, genießen alß sich geburt, verdinen und den lehin wie ufft die zcufalle komen rechte folge thun, als sollicher gesampter lehinguter alt herkomen
recht und gewonheid ist on alles geverde. Doch unschedelich der wolgebornnen frauwen Annan grafynn und frauwen zcu Stalberg wittwen an yrem
lipgedinge das sie had an und uff den slossenn Rebenyngen und Roßla mit yren zcugehorungen vorberurt, nach laut unnser brive yre doruber gegebin auch
on geverd. Des alles zcu urkunde habin wir unnser furstlich maiestad insigel fur uns, unnser erben, erbnemen und nachkomen mit rechter wiessen an diesen
brieff thun hencken. Gebin zcu Wiessinse uff mittwochin Agnetis virginis nach Cristi unnsers herren geburt tausend vierhundert und darnach
im einundsechzigstenn jarenn.
Zusammenfassung:
Herzog Wilhelm von Sachsen, Landgraf in Thüringen belehnt die Grafen Ernst und Hans von Hohnstein mit Lohra, Utterode, Großenehrich, Bodungen und Bleicherode, sowie die Grafen Ernst und Hans von Hohnstein, Heinrich von Schwarzburg und Heinrich von Stolberg, Herr zu Wernigerode, gemeinschaftlich mit Röblingen, Roßla, Ebersberg, Arnsburg (Arnsperg), Greußen und Clingen in der Weise, dass, wenn einer von ihnen ohne Leibeslehnserben stirbt, sein Anteil auf die andern übergehen soll.
Derselbe Inhalt wie Nr. 380.