Gerhardus dei gratia sancte Maguntine sedis archiepiscopus, sacri imperii per Germaniam archicancellarius, dilectis in Christo . . abbati et | conventui Celle Pauline salutem in domino. Quia per predecessorum nostrorum pium favorem gratia speciali monasterium vestrum | cognovimus dotatum nos nihilominus paterno circa vos moti affectu ob honorem et reverentiam dei eiusque genitricis in supplementum | luminum curam infirmorum et usum pauperum vestros parrochiales ecclesias in Milwiz, in Rotinbeche, in Sulzdorf et in Gozilburn nostre dyoceseos, in quibus ius patronatus habetis, cum attinenciis universis ecclesie vestre conferimus presentiarum auctoritate litterarum, ut vobis perpetuo liceat per idoneos vestre ecclesie monachos easdem in spiritualibus procurare, nostro, successorum nostrorum et archidiaconi iure salvo. Siquis autem temerarius, quod nos ob spem eterne retributionis fecimus, hanc concessionis nostre paginam infringere presumpserit, indignationem dei omnipotentis, beati Martini et nostram se noverit incursurum.