Frater Hugo miseratione divina titulo sancte Sabine presbyter cardinalis apostolice sedis legatus dilectis in Christo . . decano et . . thesaurario ecclesie | sancte Marie Erfordensis Maguntine dioceseos salutem in domino. Sua nobis . . abbas et conventus monasterii de Cella Paulina ordinis sancti | Benedicti Maguntine dioceseos petitione monstrarunt, quod tam ipsi quam precedentes eosdem possessiones, decimas, redditus, pensio|nes, maneria et quedam alia bona eiusdem monasterii datis super hoc litteris et interpositis iuramentis ac penis adiectis in gravem lesionem ipsius monasterii quibusdam clericis et laicis Maguntine et Halberstatensis civitatum et dioceseon aliquibus eorum ad vitam, nonnullis vero ad non modicum tempus et aliis perpetuo ad firmam vel sub censu annuo concesserunt, quorum aliqui litteras confirmationis a nobis et aliis legatis sedis apostolice impetrarunt. Nos itaque dictorum abbatis et conventus supplicationibus inclinati discretioni vestre, qua fungimur auctoritate, mandamus, quatinus ea, que de bonis dicti monasterii per concessiones huiusmodi alienata inveneritis illicite vel distracta, non obstantibus predictis iuramentis, penis, litteris et confirmationibus, ad ius et proprietatem ipsius monasterii legitime revocare curetis, contradictores per censuram ecclesiasticam compescendo, testes autem qui fuerint nominati, si se gratia, odio vel timore subtraxerint, per censuram eandem cogatis veritati testimonium perhibere.