In dei nomine, amen. Nos Bertramus dei gratia abbas Celle venerabilis domine Pauline Christi fidelibus universis huius | scripti tenorem legentibus per iter regularis discipline pergere usque ad bravium vocationis superne. Quoniam, ut ait apostolus, omnes stabimus ante tribunal | Christi recepturi, prout gessimus in corpore, sive bonum sive malum fuerit, oportet nos diem messionis extreme misericordie operibus prevenire ac | eternorum intuitu seminare in terris, quod reddente domino cum multiplicato fructu recolligere valeamus in celis, firmam spem fiduciamque tenentes, quoniam, qui parce seminat, parce et metet et qui seminat in benedictionibus, de benedictionibus et metet vitam eternam. Sciant igitur omnes filii, qui huic ecclesie in Christo nascentur et exurgent, quod nos ob interventum et peticionem dominorum nostrorum bona voluntate concessimus et permisimus in supplementum infirmarie nostre et recreationem infirmorum, ut, quicunque exstiterit infirmarius, curam parrochiarum Hengilbach et Sulzdorf habeat in perpetuum. Quod ut stabile et inconvulsum omni permaneat evo, hanc paginam inde conscriptam sigillo nostro insigniri fecimus.