In nomine domini, amen. Nos Guntherus, Otto et Guntherus dei gratia comites de Kevernburg, fratres, recog|noscimus tenore presencium litterarum et ad noticiam universorum volumus pervenire, quod de nostra licencia et volun|tate fidelis noster Ulricus miles de Elcheleibin bona universa ac iurisdictionem ville Elcheleibin predicte cum | omni iure et attinenciis eorundem tam extra villam quam in villa ibidem, que ibidem Ulricus a nobis iure tenuit feodali, vendidit honorabilibus viris . . abbati et conventui ecclesie Celle Pauline ac ipsi ecclesie pro certa pecunie quantitate. Nos quoque accepta ab eodem milite resignacione et renunciacione manuali ipsius eadem bona cum omnibus suis attinenciis, iuribus et dominio libere contulimus et conferimus per presentes . . abbati, conventui et ecclesie prenotatis proprietatis titulo perpetuo possidenda pro viginti marcis argenti usualis nobis iam integraliter persolutis, volentes et bona fide promittentes dolo ac fraude qualibet amputatis eos de bonis huiusmodi iugiter warandare et quorumlibet inpeticiones et actiones in quantum debemus et possumus efficaciter submovere. Exnunc etiam renuncia-mus omni actioni, iuri et iuris suffragio, si quod in predictis bonis nobis competit vel competere poterit quoquomodo, ita quod de cetero neque racione iuris neque racione advocaticii neque occasione iuris alterius cuiuscunque omni exactione cessante in eisdem bonis nichil iuris nobis vendicabimus ullo modo, sed potius contra omnes ipsam ecclesiam inquietare et perturbare volentes in illis protectionis et defensionis clippeo defensare. Ad maiorem cautelam ac evidens testimonium omnium premissorum omni exceptione, inpugnacione, exactione cessantibus, que super cautelis seu sollempnitatibus sive sint de esse sive de bene esse huic contractui non adhibitis vel neglectis possent opponi quocunque, per quas idem contractus et donacio seu collacio posset aliqualiter inpugnari, hanc cartam ad inviolabilem firmitatem sigilli nostri, quo omnes contenti sumus, appensione fulcimus et presentis scripti patrocinio roboramus in presencia testium subscriptorum, videlicet Henrici et Ottonis sacerdotum, plebanorum in Quitelsdorf et in Grizheym, Ulrici de Elcheleibin, Elheri de Rochusen, Conradi dicti Weygir militum, Henrici marscalci in Divurthe, Hermanni Parvi in Grizheym, Thiderici de Wilresleibin, Karuli de Volcunstete et fide dignorum aliorum plurimorum.