Noverint universi presentium inspectores, quod nos Gebehardus decanus Maguntinus | nomine honorabilis viri domini Theoderici prioris sancti Andree, cappellani domini papalis nuncii super | colligendis censibus in Alemanie partibus, qui ecclesie Romane debentur, deputati, qui nobis | in colligendis dictis censibus per Maguntinam dyocesin vices suas commisit, a venerabili viro abbate et conventu ecclesie, que dicitur Cella domine Pauline, ordinis sancti Benedicti, dyoceseos Maguntine, pro censu, quem ipsi ecclesie Romane, scilicet unum bisancium aureum annis singulis, dare tenentur, nos recepisse fatemur in civitate Maguntina IIII Kalendas Aprilis anno domini millesimo CCLXXXVIIII tres marcas et dimidiam examinati argenti cum lotone pro valore viginti octo bisanciorum aureorum et dimidii medio fertone quolibet bisancio integro et lotone bisancio dimidio computato, pro viginti octo annis et dimidio proxime preteritis presenti anno usque VIII Idus Aprilis proxime venientis conputato, in ipsis visa caucione preterite solutionis facte magistro Beraldo canonico Adriensi tunc domini pape nuncio super sepedictis censibus colligendis. In cuius solutionis fidem presentem litteram scribi iussimus sigilli nostri munimine roboratam. Datum loco, anno et die predictis.