Nos L. scolasticus et officialis ecclesie sancti Severi et magister Her[mannus] officialis prepositure ecclesie sancte Marie Erfordensis | recognoscimus tenore presencium literarum dilucide profitendo, quod maldrum et dimidium frumenti, quod Helmburgis begina | uxor quondam magistri Th. de Vrankenhausen et Kristina filia eiusdem comparaverant apud dominum Bertoldum olim abbatem | Celle domine Pauline ac eius conventum pro certa summa quantitate ad tempora vite ipsorum libere possidenda, que maldra dominus Wernherus abbas Celle domine Pauline reemit pro novem talentis denariorum Erfordensium eis integraliter persolutis, renunciantes eedem omni iuri et beneficio literarum, que occasione dicti contractus habuerunt et sibi conpetere dinoscebantur. In quorum testimonium presentem literam dedimus nostrorum sigillorum munimine roboratam. Testes huius sunt: dominus Her[mannus] dictus Capuz, dominus Theodericus de Wimaria sacerdos, dominus Nicolaus quondam notarius, dominus Hugo plebanus in Holzhusen et alii quam plures fide digni.