Conradus decanus ecclesie Cycensis iudex a sede apostolica inter partes infra scriptas delegatus discretis viris | domino . . abbati in Elwerstorf et domino . . decano ecclesie Beberacensis salutem in domino. Quia in causa, quam | dominus abbas et conventus Celle domine Pauline prosequitur et dudum prosecutus est contra Abraham, Brendechen, Sampsonem | et Matheum fratres Iudeos in Szrapphelo in iudicio coram nobis, testes sunt in dicta causa necessario producendi ex parte predicti domini . . abbatis et sui conventus et cum testes non possint secure comparere in Cyce coram nobis ad perhibendum testimonium veritati propter viarum discrimina, inimicicias et metus, qui possunt cadere in constantes et ut parcatur laboribus et expensis, vestre discrecioni committimus et mandamus, quatinus testes, quos vobis predictus dominus . . abbas vel procurator suus vobis duxerit nominandos, ad vestram peremptorie citetis presenciam, quos et nos citamus peremptorie per presentes, ut compareant coram vobis in Elwerstorf die, qua vobis competierit, perhibituri testimonium veritati in causa supradicta, quos prudenter et diligenter iuratos examinare curetis iuxta articulorum intencionem et interrogatoria si vobis dabuntur, alioquin servata consuetudine et ordine iuris ipsos examinetis iuxta intencionem producentis, quam examinacionem discrecioni vestre committimus diligenti, remittentes nobis ipsas attestaciones sigillis vestris fideliter interclusis ante feriam quintam post epiphaniam domini proximam, quam diem ad publicandum dicta testium partibus assignavimus et presentibus assignamus, hoc etiam adiecto, quod, si ambo dicte examinacioni interesse non poteritis, unum vestrum nichilominus exequatur.