Datum per copiam. Honorabili domino decano Cyzensis ecclesie, iudici a sede apostolica delegato, | Brendeke, Abraham, Samson et Matheus fratres Iudei in Querenvorde quicquid | reverencie poterunt et honoris. In causa, quam honorabilis dominus abbas Celle Pauline | contra nos movere proposuit, Iohannem Scolarem exhibitorem presencium in vestra presencia nostrum procuratorem constituimus ad allegandum in potenciam veniendi et ad petendum locum tutum et accessibilem, dantes sibi potestatem iurandi in animas nostras, petendi, excipiendi, replicandi et generaliter omnia, que de iure debet et facere potest legitimus procurator, ratum et gratum habentes, quidquid per ipsum ad presens in causa pretaxata fuerit ordinatum. In cuius rei testimonium sibi presentem literam domini Geuehardi de Querenuorde sigilli munimine tradimus roboratam.