Datum per copiam. Honorabili viro . . domino decano ecclesie Cycensis, iudici a sede apostolica delegato, Brendeke, | Abraham, Schauedei vel Samson et Matheus, fratres Iudei morantes in Querenvorde, obsequium in omnibus benevolum et | paratum. Honorabilitati vestre presentibus cupimus esse notum, quod in causa, quam nobis coram vobis movet seu movere intendit ho|norabilis vir dominus abbas Celle domine Pauline, exhibitorem presencium dominum Hartmannum decanum ecclesie Biberacensis facimus et constituimus nostrum procuratorem, actorem ac defensorem et nuncium specialem, dantes eidem potestatem agendi, defendendi, petendi, respondendi, excipiendi, replicandi, litem contestandi et prestandi in animas nostras cuiuslibet generis sacramentum, locum tutum petendi, appellandi, appellacionem prosequendi, alium procuratorem substituendi et eundem revocandi et generaliter ad omnia faciendi, que poterit legitimus facere procurator, gratum et ratum habituri quidquid per eundem procuratorem nostrum vel eius substitutum ordinatum fuerit in premissis vel aliquo premissorum, promittentes pro eo vel eius substituto iudicatum solvi, iudicio sisti in omnibus suis clausulis sub ypotheca rerum nostrarum et hec vobis et parti adverse presentibus cupimus esse notum et omnibus, quorum interest vel interesse poterit, sub testimonio sigilli nobilis viri domini Gebehardi Longi de Querevorde. Nos vero Gebehardus Longus de Querenvorde ad peticionem dictorum Iudeorum sigillum meum duximus presentibus appendendum.