Honorabili domino decano Cycensis ecclesie iudici a sede apostolica delegato Abraham, Brendeke, Sauedey et Matheus | Iudei in Schrapelowe quidquid reverencie servitii poterunt et honoris. In causa, quam honorabilis dominus abbas Cel|le domine Pauline movet seu movere intendit nobis coram vobis, dominum Heinricum plebanum in Schrapelo | exhibitorem presencium singulariter et universaliter nostrum fecimus et constituimus procuratorem litteras per presentes, dantes et concedentes eidem liberam potestatem allegandi in potenciam veniendi, agendi, defendendi, replicandi, libellos ac alias quascunque peticiones dandi et recipiendi, sentencias interlocutorias seu alias audiendi, appellandi si necesse fuerit, prestandi in animas nostras iuramentum calumpnie seu de veritate ac aliud cuiuslibet generis sacramentum, alium procuratorem vel procuratores substituendo et omnia ac singula faciendi, que vero et legitimo procuratori a lege et canonibus sunt indulta. Eciam si exigatur mandatum speciale et ut predictus vel ab eo substitutus relevetur ab honore satis dandi, promittimus pro ipso iudicio sisti ac iudicatum solvi sub nostrarum rerum ypotheca, ratum et gratum habituri, quidquid per ipsum seu per eius substitutum factum fuerit in premissis et hoc parti adverse ac omnibus, quorum interest, de consensu et consilio venerabilis in Christo patris ac domini Magdeburgensis episcopi sub sigillis nobilium dominorum et comitum de Schrapelo Halberstadensis dyoceseos recognoscimus, quod ad peticionem prescriptorum nostrorum Iudeorum sigilla nostra in testimonium presentibus duximus apponenda. Datum et actum Schrapelo, anno domini MCCCXIIII, feria tercia proxima, qua cantatur Reminiscere. Datum per Copiam.