Nos Guntherus dei gratia comes de Swarczburg recognoscimus palam per presentes ac omnibus tam presentibus quam futuri | temporis successoribus cupimus fore notum, quod quendam dimidium mansum terre arabilis situm in campis ville Tych|manstorf, solventem singulis annis dimidiam marcam argenti Fribergensis, quem excolit Heinricus dictus Penacz, dedimus legittime et pure propter deum domino Theod[erico] abbati totique conventui monasterii Celle Pauline, ordinis sancti Benedicti, et damus perpetuo possidendum in hiis scriptis. Nichilominus sepe dictum mansum dimidium dicte ecclesie Celle Pauline cum omni iure, usu fructu, obsequio et honore, quo prefatum dimidium mansum actenus dinoscimur possedisse, approprietavimus et presentibus approprietamus, ita sane, quod nobis ac omnibus nostris successoribus penitus nichil iuris seu facti reservamus dimidio manso in predicto, eo quod ius feuodi super eodem ad nos spectabat simpliciter et precise. Ne igitur dicta donacio, pariter et approprietacio, in posterum ab aliquo valeat infirmari, presentem literam sigillo nostro in testimonium premissorum fecimus firmiter communiri.