Wir Ditrich, von gots gnaden appit zu der Paulins Zelle, ordens des helgen sente Benedictus, und der convent daselbes gemenliche bekennen offenlich an disem | genwertigen brife und tuen kuent allen den, di un gehoren lese ader un gesen, daz di eydeln herren greve Henrich und greve Gunther di gebruder, greven | von Swartzburg, hern zu Blankenberg, haben an gesen von rechter truwe den nuetz und di selkeit ures lieben vater sele, greven Henrihs von Swartzburg, das um goit gna|de, und haben uns gegeiben zu den fumf marken ierliches geldes, di uns ur vaiter selben gemachet hait, an unsem eigen guete zu Elchleben, da her uns vur gab drizich mark lotiges silbers, zwenzich mark und hundert lotiges silbers und um di zwenzich mark und hundert vorbinden wir uns zu geldene ierlich zwenzich mark, der schult unses vorgenanten herren, der schuln an trete uf sente Michahels tag schuln wir bezale zwenzich mark gantz und vort alle iar also vile, biz di schult gar vor golden wirt. Eiz ist och geteidinget, ab wir icht abe beiten dire schult durch goit ader durch unser herren willen ader anders wel wis daz gesche, das schuln wir nicht abe slan von den zwenzich marken wir enschuln alle iar di zwenzich mark gantz bezaln an den steten anderswa da man schuldik ist. Und von den vorgenanten funf marken, di unse herre ur vater zuet uns gekoif hait und von den zwenzich marken, der wir uns ierlich vorbunden haben als hir vorgscreben ist, schuln wir nemen vor unse erbeite und vur unse koste fumf mark, di andern zwenzich schuln wir gancz geben, alle iar vür sine schult und vur alle di, di her betrubet hait an urme libe ader an urme gute zu unrechte an alle di stete di uns unse vorgenanten herren nue ader her nach bescreben geben ader di uns anders mochte redelich wizenlich gemachet werde. Wir schuln och an alle den steten und in alle den gerichten, di uns bescriben werden gegeben, flizcliche vorschen mit unser koste und mit unser erbeite nach der groze des schaden und nach den lueten, den der schade gesehen ist und schuln di abe lege nach gnaden ader nach rechte und diz vorgenante geld da wir uns zu vorbunden haben schuln wir gelde und geibe von iare zu iare, biz wir vor gelden alle di schult unses vorgenanten herren als hir vor bescriben ist. Och schuln wir daz duen mit rate und mit heze greven Heinriches und greven Gunthers siner suene di wile daz sue leiben vort mer daz wir di schult unses liben herren deste baz vorgelden unde deste er und deste flizclicher so haben unse vorgenanten herren sine sune zu helfe gegeiben funf mark ierliches geldes und vur alle daz daz ur vater ader su unse closter zu unrech gedrungen ader beschait haben di schuln wir alle iar uf neme mit dem vorgenantem gelde biz daz di schult zu male vorgolten wir und der fumf marke schal alle iar ein halbe gevalle der eptissin zu Ilmen und ein halbe bruder Gunther urme vettern vur ur erbeite dar nach wan die vorgenante schult zu male vorgolden wirt, so schuln wir dirre vorgenanten fumf marke vire mit den andern fumf und zwenzich marken eweclich besitze zu eime rechten gelde also bescheidenlich daz wir zu vire geziten in dem iare di da hezen quatuor tempora ader wichvaste, di wir och in unse kalendar bescribe schuln, so schuln wir begen iargezit des vorgenanten herren und sins vater und siner muter und alle sins geslechtes und siner beider vrowen vorn Kirstin und vorn Vten und alle der di her betrubet hait an dem gute ader an dem libe und alle der di toit sin an striten von sin wegen ader anders von sin wegen mit vigilgen und mit messen und zu islicher zit schal gesehen ein dinst dem convente von funf virdungen eweclich von den fumf marken, der uns vire gevallen schuln wir bewisen nach dem daz zu male vorgolden ist eine mark dem closter zu Ihnen eweclich da von su schuln gedenke unses vorgenanten herren. Och vorbinden wir uns an disem brife alle iar rechnunge zu haldene vor den proste und der eptissin zu Ilmen und vor bruder Gunther von Swartzburg urme veitern ab man un gehabe mach und schuln da hin brenge brife und urkunde der lute den des iares vor golden ist. Och vorbinden wir uns vor unsem herregote alle dise vorgescriben rede stete zu haldene bi guten druwen an argelist und geben des disen brif bestetiget mit unsem insigel und unses conventes insigel. Och lazen wir dir brife ein zu Ilmen bi dem proste und der eptissin zu eim gezuchnisse alle dirre Sache. Dir sache sind gezuge der edel herre greve Gunther von Swartzburg des selben herren bruder und bruder Henrich von Frimar, mester der helgen scrif, von sente Augustins orden, und bruder Gunther von Swartzburg, der predeger orden, bruder Albrech von Barby der lesemester vom Berlin, der minner bruder ordens, di dise vorgenanten dink geteidinget haben.