Universis Christi fidelibus presentes literas inspecturis Henricus dei gratia sancte Moguntine sedis archiepiscopus, sacri imperii | per Germaniam archicancellarius, salutem in eo, qui est omnium vera salus. Cupientes quoslibet Christi fideles ad | karitatis et devotionis opera quibusdam donis spiritualibus et aliis modis et viis quibus possumus invitare, | ut per hec et alia bona opera, que inspirante altissimo fecerint, reddantur divine gratie aptiores, omnibus igitur vere penitentibus et contritis, qui ad altare in honorem omnipotentis dei necnon beati Pantaleonis ac quorundam aliorum sanctorum in cymiterio dicto, volgariter in dem paradise, monasterii Pauline Celle, ordinis sancti Benedicti, nostre dyoceseos, per strenuum et prudentem militem Theodericum de Elcheleibin in sue suorumque progenitorum ac posterorum animarum salutem et remedium de novo instauratum et dotatum quicquam de bonis sibi a deo collatis pro libris, luminaribus, ornamentis eiusdem altaris seu pro sustentatione ad idem altare sacerdotis instituti donaverint seu legaverint, aut qui dictum altare causa devotionis visitaverint ac pro nobis gregisque nobis commissi ac predicti instituentis felici statu unam orationem dominicam cum salutatione angelica devote peroraverint, de omnipotentis dei misericordia et beatorum Petri et Pauli apostolorum eius necnon gloriosi confessoris beati Martini patroni nostri meritis et auctoritate nostra confisi quadraginta dierum indulgencias misericorditer in domino relaxamus. Insuper indulgencias per venerabilem in Christo patrem dominum episcopum . . Lavacensem ad idem altare concessas, prout rite et rationabiliter concesse sunt, ratas habemus atque gratas easque in dei nomine presentibus confirmamus.