Dignum creditur et honestum, ut, qui domini servicio se sponte subicit, digno retribucionis solacio consoletur. Hinc est, quod ego Bruno quondam plebanus in Wilresleybyn divinam contemplacionem magis habens pre oculis, quam terrenam, universis ac singulis tam presentibus quam futuris, quorum noticie presens scriptum fuerit exhibitum, cupio fieri manifestum, quod de bonis Guntheri dicti de Walesleybyn, que idem Guntherus a domino abbate et conventu monasterii Celle domine Pauline una cum suis heredibus tenet seu possidet iure hereditario, cum consensu et voluntate domini abbatis, domini videlicet Bertoldi de Keuerenberg bone memorie, in bonis dicti Guntheri cum consensu uxoris sue heredumque suorum omnium de manso videlicet et dimidio in campis dicte ville Walesleybyn situatis solventes dictis dominis videlicet abbati et conventui monasterii prehabiti duos solidos denariorum annuatim pro censu hereditario in festo beati Michahelis, michi comparavi ad eundem Guntherum et suos heredes unam marcam annui census in festo prescripto beati Michahelis pro marca quadraginta et octo solidos de bonis prehabitis michi dandam tradendam seu, cui dedero vel legare proposuerim, recipiendam perpetuis temporibus sine dolo. De quibus quadraginta et octo solidis domino abbati et conventui cenobii prelibati donavi, tradidi et legavi triginta solidos denariorum post mortem meam perpetuo recipiendos, ita sane, quod eosdem triginta solidos testamentarius dominorum pretactorum quicunque pro tempore fuerit perpetue recipiat et in die anniversarii mei et famule mee Adhilhedis, qui anniversarii nostrorum utrorumque, postquam de hac vita discesserimus, insimul sunt peragendi, pecuniam sepefatam dominis et dominabus, donainis videlicet unum talentum et dominabus decem solidos distribuant perpetuis temporibus, ut prelibatum est fideliter retinendum. Est insuper adiectum specialiter et condictum, quod, si Guntherus prenotatus vel sui heredes dictos triginta solidos redimere seu reemere voluerint, pro quinque marcis puri argenti redimendi vel reemendi liberam habebunt facultatem. Quod si factum fuerit, dictus conventus seu eorum testamentarius cum dictis quinque marcis alios triginta solidos reemere seu comparare debet ipsosque distribuere, secundum quod superius est expressum. In quorum omnium robur et fidem firmiorem presens scriptum meo sigillo duxi firmiter roborandum.