Nos Hermannus dei gratia abbas, Hartungus prior totusque conventus monasterii Celle domine | Pauline recognoscimus per presentes, quod promisimus presentibus et promittimus strennuo militi Theoderico | de Elcheleybin propter bonum donationis sue partis in iure patronatus ecclesie in Elcheleybin | nec non et propter alia beneficia nobis et ecclesie nostre exhibita per eundem et adhuc exhibenda ac eciam propter multiplices promotiones nobis et ecclesie hucusque inpensas et actenus inpendendas singulis annis perpetuis temporibus, postquam divina clemencia eum ab hoc ergastulo carnis evocavit, anniversarium ac uxoris sue legittime Mechtildis nec non et omnium suorum progenitorum peragere debemus cum missis et vigiliis ceterisque bonis, que in nostro conventu divina clemencia dignabitur operari. Promittimus eciam stipulanti promissione, quod ad anniversarium predictum, ut fratres conventus et sanctimoniales de laboribus recipiant solacium congruum, quod unum servicium de una marca Fribergensis argenti de reditibus ecclesie in Elcheleybin volumus singulis annis perpetuis temporibus donare et appropriare, ita quod singulis personis fiat melioratio secundum exigenciam et extensionem pecunie memorate. Insuper est condictum, quod ad regimen animarum ecclesie parrochie in Elcheleybin debemus preficere personam discretam, ydoneam et honestam, quam quidem personam, si se indecenter apud rusticos seu parrochiales nec non eciam apud dominum de Elcheleybin militem predictum regeret et teneret, extunc ex causis rationabilibus nos ad hoc moventibus eandem personam mutare debemus et aliam magis idoneam preficere omni contradictione postergata. In cuius rei testimonium dedimus presens scriptum sigillo nostre abbatie nostrique conventus predicti firmiter roboratum. Testes autem huius rei sunt dominus Hermannus plebanus in Remde, dominus Iohannes ac dominus Theodericus fratres plebani in Suntremde et quam plures alii fide digni.