Frater Heinricus de Appoldia, dei et apostolicae sedis gratia episcopus Lauacensis gerentes vices in | pontificalibus reverendi in Christo patris ac domini domini Heinrici sancte Moguntine sedis archiepiscopi universis | Christi fidelibus salutem in eo, qui neminem vult perire. Cupientes quoslibet Christi fideles ad opera pieta|tis viis et omnibus modis congruentibus et deo placitis invitare omnibus vere penitentibus, contritis et confessis, qui monasterium sancte Marie virginis, beati Iohannis baptiste, sancti Iohannis ewangeliste et sancti Benedicti in Cella, beate Pauline et ecclesiam sancti Iacobi in Rotenbeche et ecclesiam sancte Marie Magdalene in Milwicz in festis infrascriptis, videlicet pasche, ascensionis, penthecostes, trinitatis, corporis Christi, nativitatis, circumcisionis et epiphanie domini, in diebus palmarum, cene, parasceves et rogationum, in diebus sancte crucis, in omnibus diebus beate Marie virginis, in singulis diebus apostolorum, in die omnium sanctorum, in die omnium animarum et in octavis festivitatum predictarum causa devotionis accesserint, vel qui cimiteria monasterii et ecclesiarum predictarum orando ibidem pro fidelibus defunctis circumiverint, vel qui corpus Christi vel oleum sanctum, cum ibidem portatur ad infirmos, secuti fuerint, seu qui ad luminaria et quevis ornamenta monasterii et ecclesiarum predictarum manus porrexerint adiutrices, quandocunque vel quotiescunque premissa fecerint, de omnipotentis dei misericordia et beatorum Petri et Pauli apostolorum eius meritis et auctoritate confisi quadraginta dies criminalium, annum venialium et unam karenam de iniunctis sibi penitenciis misericorditer in domino relaxamus.