Ich Herman von Grizheim der junge, ritter, gesezzen zcu Gelstorf, bekenne uffelich alle dein die | desen keinwerdigen brif gesein oder horen lesen, daz ich mit guter vordechticheit mit | rate mines vater unde anderre minre frunde mit willen unde mit wizzen miner vrowen | unde alle miner erben recht unde redeliche vorkouft habe zwei phunt ierliches zcinzez deme erbern hern deme apte unde alle der gemeinen samenunge dez closterz zcu der Paulinen Celle vor drizcein phunt phenninge, der su mich gutlich haben bescalt, von einer huve landez, die iz geleygen in deme velde zcu Rotenbach, daz da lit hinder Gezzilborn unde an der selben huve hat daz vorgescrebene closter unde an alle deme gute, daz in daz velt zcu Rotenbach gehort, lein unde eygen eweclich besezzen. Dese vorgenanten huve hat ich von deme clostere zcu erbe, die hap ich ufgelazen deme clostere mit alleme rechte alse ich su von deme gotehus hatte. Desen selben huve mit willen unde mit wizzen minez hern des aptiz vorkouft ich Iohannezze Smede, der zcu Ilmene gesezzen ist, zcu sulcheme zcinse deme gothuz zcu gebene alse zcu rechte da von gevellet. Dar ober behilt ich dannoch swei phunt ierlichez zcinsez an derselben huve. Die swei phunt hab ich vorkouft deme hern deme apte unde der samenunge dez vorgenanten closters vor drizcein phunt phenninge alse hie vor redelich bescreben ist. Des geldez oder dez zcinzez der sweiger phunde gelobe ich den hern dein apt unde daz gotishuz stetlich zcu werne vor allerleyge ansprache unde hindernisse, alse ich zcu rechte sal. Dar ober gebe ich desen brif deme vorgenanten apte unde deme gothuz mit mime insegele unde mit minez vater insegele besegelt unde bevesten. Ich Herman von Grizheim der alde bekenne uffelich, daz ich min insegel durch minez sons Hermannez bete an desen keinwerdigen brif zcu eime gezcuicnizze habe gehenget. Des koufes unde derre rede sint gezcuic her Iohannez von Elch[leben] der pherrer, Gunther Franke dez closters schultheizze, Bertolt von Orlamunde scriber dez closters, Appeitz Store von Wimar, Fricze von Luttenberg unde gnuc anderre fromer lute me. Derre brif ist gegebin nach gotis geburt tuzint iar drihundert iar in deme eyn unde vircigisten iare, an sente Lucien tage, der heyligen iuncwrowe.