Ich Heynrich Grellennort burger czu Salueld, Ermegard myne eliche wyrtin, bekennen uffenlichen | an dißem offen briffe vor alle den, dy on sehen, horen adir lesen, alzo ich geschuldiget habe myn | gnedigen hern hern Iohannese Hocherczen, apte in sendte Paulyn Czelle, umbe den wolst, den | ich Ermegarden syner mumen mache lyß czu myner hochcziit, daz her mir den gancz unde gutlich woll beczalt had unde sage on dez quyd, ledig unde loß. Ouch vor czihe ich mich unde dy vorgnante Ermegard myne eliche wirtyn myt alle unsen erben, alzo daz wir on nummer vort meer an spreche noch reyche sullen umbe keynerleye gelobde adir andirleyge schulde wy man dy erdenghe adir geneme mochte wedir geystlich noch wertlich noch nymand von unser wegin dy wyle daz her lebyt. Dez sind geczugen unde gethedinget haben dy ersammen hern er Heynrich Hetstete unde er Albrecht Reynhard unser cappelan, Hannes Holczschuch, Clauwes Schonsmed, burgere czu Salueld, unde Iohans Holczschuch, dez vorgnanten er Iohans Hocherczen aptis schriber. Dez czu orkunde unde merir sicherheyt habe ich obgnanter Heynrich Grellennort vor mich unde vor alle myne erben mynen insegill wissentlichen laßen henge undene an dißen offen briff.