Wir Gebehart von gotis gnaden herre zcu Quernforte, Brun unsir son und alle unse erben bekennen offinlichin an desem offin brife | allen den, dy en sen odir horin lesen, daz wir mit gutem bedachten mute und mit vorrate gegeben habin und gebin den ersamen | herren dem apte und der samenunge des clostirs zcu der Paulinen Celle eylftehalb hufe arteackirs . . . . in de hufe drizig ackir gemessin | landis mit der gertyn, alse do gewonlichin ist, unsirs fryen eygen gutis gelegen in den felden des dorfis, daz da heysit Louwinhouevipech mit deme hofe und gebuwe daz dor zcu gehort, daz da heiszit daz alde vorwercke gelegen vor der borcke alda selbins gesundir uz gesloszin eyn gertichin und eyn tichlichin dar ynne umme daz gut und umme alle friheit an ackere, an holzce, an hofin, an backehofin, an zcinsen, an kirchleen und an allen guten da daz vorgenante gotishuse recht zcu gehat hat odir noch gehabin mochtin besucht odir unbesucht in deme dorfe und in den felden zcu Gaterstete. Ouch bekennen wir obgenante hern von Quernforte und alle unse erben, daz wir daz obgenante clostir der Paulinen Celle unde syne vormunden an dy vorgeschreben gute gelegen zcu Louwenhouevipech brengin und weryn sullin vry eygen und eygen alzo eygins recht ist vor gehegit der bancke also daz man von den vorgeschreben guten . . uns und unsen erben noch deheyme hern geschoz bete vrone hofefutir noch deheinerleie dinst tun sollen odir ab dy vorgenanten gute von on quemen odir komen mochten iz wern ritter odir knecht, burger odir gebuwir daz sy dy selben gut besitzin sollin mit allir friheit und wirdikeit alse vorgeschrebin sted. Ouch virzcien wir uns und alle unse erben alles rechten, daz wir gehatte haben und haben mochten an den vorgeschreben guten sundir den hofe eyne daz da heiszit daz Alde Vorwercke ab der besaczt wurde mit deheinerleie luten dy des gotishuse diner nicht enwern dy sullin von dem vorgenanten hofe alleine dinen also daz gewonlich were und ist. Daz alle dese vor und noch geschreben rede, stucke und artikele stete und gancz und unvorbrochlichin von uns . . und von alle unse erben an argeliste und geverde gehalden werden, daz wir obgenanter Gebhard herre zcu Quernforte, Brun unsir son wizsentlich desen genwortigen offin brife dem obgenanten clostir Paulin Celle gegeben wol vorinsigelt mit unsin angeborn insegilen, dy wir daran gehangen haben. Alle der vorgeschreben rede und eigenschaft sint gezcuge dy edelen . . unseliben omen graven und herren zcu Bichlingen Conrad unse ome der eider herre zcu Tannenrod, Hanse von Vipech, dy alle durch unsere bete, willen und bekentnisse dirre vorgeschreben rede ore insegile zcu unsine insegilen an desen unsern brife gehangen.