Wir Iohannes von gotis gnadin grave unde herre zcu Swarczburg, grave Gunthir sin | son, bekennen vor uns unde alle unse erbin, daz wir vorsaczt haben unde mit uns selbschuldig | wordin ist der erwerdige Iohannes apt zcu der Paulin Celle unde ouch mit uns selbschuldig | wordin sint hern Otto vom Hofe probist zcu Ylmene, Conrad von Elxleyben, Beringer von Wyzceleybin, Lutolf von Willirssleybin unde Thycel von Berlstete unde mit uns gelobit habin in unse unde irme brife ken Herman Kelner borger zcu Ylmene unde synen erbin vor achczig phunt unde drissig schillinge guter phennige als der briff us wised, den wir dar obir gegebin habin. Des globides unde der gnantin sumen geldis globin wir obgnante grave Hannes unde grave Gunthir unde alle unse erbin den obgnantin Iohannes apt zcu der Paulin Celle unde daz clostir unde dy samenunge gemeinlichen abe zcu nemene an alle iren schadin of den nesten sente Michils tag an argelist und geferde. Gesche des nicht, was sy dar nach des schadin nemyn geistlichin odir wertlichin odir was sy umme dy gnanten summen geldis mochte angetrete wy daz queme, den schaden mit dem houpgute gelobin wir en unde sullen en wedir kere unde da von brenge an of zcog unde wedir rede unde an alle argelist unde gebin des dem gnantin apte unde clostir zcu orkunde unde sichirheit desin unsen offin brif mit der anhengunge unses sygel.