Wir Cunrad von Yscherstete von gotis gnadin apt zu der Paulinen Zcelle mit allen unsir nochkome|lingin bekennen uffinlich an desme uffin brife allen den, dy en sehn, horn oder leyn, daz er Petir von | Erforte hat gekouft eylf Schilling phenge ewigis zcinsis an zcwolf ackirn gelegin zu dem Hofiln | zu syme nuwen altare in der Zcelle di da gwyt ist in sende Elzabetin ere. Den vor geschrebin zcins gebit Heinrich Hanes und syne erben oder wer dy obgnanten zcwolf ackere ynne hetten ierlich uff sende Michahelis tag, alzo zcinses recht ist, zu dem obgnantin nuwin altare in der Zcelle den der egnante er Petir hat gelazin machin und wedemyn zu eyme ewigen gedechtnisse und selgerete syner selle, alle syner altfordirn sele zu troste und allen geloybigin seln. Den habe wir dazu geeygint und williclygin gewidemet eweclich an argelist und an geferde. Den selben obgnantin zcins hat gekouft der obgnante er Petir redelich von Hannes Vornzcysin und gancz und gar bezcalt und vorgoldin. Daz alle deze vorgeschrebin rede, stucke und artickel stete und gancz von uns und von unsir nochkomelingin gehaldin werdin, dez habe wir obgnante herre Cunrad apt dezin uffin briff gegeben dem megnanten ern Petere, der da wissintlich ist vorinsigelt mit unsir aptige insigel.