Wyr Iohannes von gotis gnaden apt zcu der Paulen Czelle bekennen und wollen, daz yz wissentlich sy allen | luthen, dy dißen briff sehen, horen adir lesen, daz wyr recht und redelich mit krafft dyßes bryffis lyhen und gelegen | haben dem erbern Hanse Wolffe und synen erben allis daz gut, daz der erbere Dyttherich von Wyrchusen seliger von | uns und unserm gotishuse zcu lehen gehabt hat, by namen vyr huffe landez, wesen, garten, holczmargke und waz in dy selbigen vyr hufe gehort und der selbigen obgnanthen vyr hüfe zcwey von uns unde unserme gotishuse zcu rechtem lehen hat, alzo lehen gutis recht ist, und dy andern zcwe huffe zcu rechtem erbe gute hat. Von den selbigen czweye huffen er uns unde unserm gotishuse ierlichin reichin unde geben sal czwey maß korns, czwey mass gersten, dry schillinge phenninge ane dry scherff und eyn halb schog eygere und ouch eyne wese gnanth dy große wese, der do ist eyn vertil unde vyr ackir gelegen by der steyn brucken zcu Grossen Lybergen, dy vor geczyten gewest ist der von Holbach, dy er ouch von uns und unseme gotishuse zcu rechtem lehen hat. Do by sint gewest dy erbern unse lyben getruwen und guten frunde Dyttherich von Elxleyben, Conrad von Roßla, Petir von Boylstete. Dez zcu bekentenis unde steter haldunge habe wyr unser insigil von unser und unsers gotishusis wegen gehengit an dißen offen bryff.