In nomine domini, amen. Wir Herman pherrer zcu Remde, iuncvrowe Helmburg Tele, dy da hat Conrade von Grevendorf, ge|swister, genant von Elcheleyben und Hedwig, Frederichs Trucchtzezen tochtir von Hetstete, unse nehestin und alle unse | erben bekennen und tun kunt uffenlichen an disme kenwerdigen brife allen den, dy en sin, horn, odir lesen, daz wir | met gutir vorbedechtcheyt entrechticlichen mit guten willen und och sunderliche mit gantzme rathe und mit hulfe unsir ediln hern grafen Henrichs, herre zcu Swarzburg und her Hermans herre zcu Kranchfeld uf dem obirn huse und alle unsir frunde vorkouft haben recht und redelichen dorch unsis bessern willen dem erbern und den geystlichen hern hern Hermanne von Hetstete dem apte und der sam-menunge gemeyn zcu der Celle der heylgen vrowen Pauline unse eygen und unse gut den hoph zcu Elcheleyben fier hufe landis, eynen bacophen und korn gulde phenning geld hofe, garten, bomgarten, daz da gelen iz in dem velde und in dem dorf zcu Elcheleyben myt wazzern, weyden, wesen, vischerige, wydich, zcins abeley und och daz gerichte und sunderlichen allez daz gut, daz an uns gevallen und geerbet ist von hern Tyzcels wen von Elcheleyben unsis frundis in dem vorgenanten dorfe pober der erden und undir der erden gesucht und ungesucht in dorf odir in velde und och met alle deme rechte, met eren und nutzcen ewiclichen zcu besitzcene vor eyn erbe und vor eygen also wiz und alle unse vorvaren biz an dysen hutigen tag ruwiclichen bescheschen haben, umme hundirt marg und zewenzcig lotigis silbers Erforter were wiz und gebe dy uns der vorgenante herre der apt und dy sammenunge gemeyn dez vor genanten clostirs gentzlichen nutzlichen und lyplichen vor gulden und bezcalt haben, och so laze wir uf an gerichte also recht ist daz eygen und daz gut und vor zeien uns vor uns und vor alle unse erben alle dez gutiz, das da vor vor beschreben stet met alle deme rechte und mit nutzeen und mit sunderlichen sachen artikiln geystlichen odir wertlichen met den der vorgenante kouf gehindirt mochte werde. Och so were wir den hegenanten hern den apt und dy sammenunge dez vorgenanten clostirs dez gutis vor eyn erbe und eyn eygen rechticlichen und ewiclichen zcu besitzcene met alle deme rechte also wiz behalden haben uf den heylgen met frien hern met unsme hern grafen Henriche herre zcu Swarzburg und met hern Hermanne herre zcu Kranchfeld und och met sulch me rechte also daz vorgenante eygen und gut an uns komen iz von unsis frundis wen hern Tyzcels von Elcheleyben an allirleye argelist ansprachunge frie und ane schaden. Daz dyse rede dez vor genanten koufs stete gancz und unvorbrochen blybe, dez han wir Helmburg Thele geswestere und Hedewig von Hetstete desen brif gevestent mit unsis bruder insigel und frundes, dez wir alle met eyn andir gebruchen met eme und wir grafe Henrich zcu Swarzburg und her Herman herre zcu Kranchfeld vorgenant dorch bete willen der vor genanten koufere und der vorkoufere und sundirlichen zcu eyme bekentnisse grozer sicherkeyt und orkunde dez vorgenanten koufs henge wir alle beyde unse insigile an dysen brif. Alle dirre vorgenanten rede unde ding sint gezcughe dy erbern und dy vromen lute her Otto von dem hofe, her Tycel von Ischirstete, her Hartman von Holbach, herr Tycel von dem hofe, rittere, Conrad von Witzceleyben, Herman von Holbach, Otto von dem hofe der iunge, Rudolf von Ischirstete, Henrich Steyn, Henrich von Holbach und andre vele gutir lute, den da wol zcu glouben iz.