Nos Hermannus de Hetstete dei gratia abbas monasterii Celle domine Pauline | recognoscimus presencium in tenore et ad noticiam omnium, quorum interest seu quibus presens scriptum | fuerit divolutum, cupimus pervenire, quod Iohannes de Phollendorf tempore iuventutis induebat | religiositatem seu cappam nostri ordinis scilicet sancti Benedicti et infra probationis annos sub forma scolaris, quia nunquam fecerat adhuc professionem, promotus fuerat sub nostro tytulo ad ordinem subdyaconatus. Tandem reliquit ordinem seu exuebat, sed tamen, quandocunque voluerit seu gratiam habuerit, nostra plena licentia sub habitu seculari postest ad ulteriores ordines promoveri, ex quo nunquam fecerat apud nos seu nostrum monasterium professionem in presens. Insuper profitemur manifeste, quod ex intercessione omnium dominorum nostrorum nostri totius conventus ex suis meritis et ex speciali rogatu aliorum suorum amicorum talem graciam sibi fecimus, quod ipse, quandocunque sibi placuerit seu competierit induere seu intrare ordinem, suam prebendam in predicto nostro monasterio acceptabit et sine omni contradictione seu dilatione firmiter obtinebit. In cuius rei evidenciam presentem literam sigillo nostre abbatie munimine duximus roborandam.