Wir Conrad von der gnaden gotis apte zcu der Paulin Celle und dy sampnunge gemeinliche unsis clostirs | bekennen unde tun kunt in desem offin briff allen den, dy on sehen, horin und lesen, das dy geistlichin Else | und Ailheid von Holbach, clostirfrouwen in unsen obgnanten clostir, gekouffit haben by unsis vorfarn gezciten | achzcen schilling geldis ewigis zcins unde fumff hunre wider Cunrad Gotzen, dem got gnad, der gesessen was zcu Blanckinberg, an virdemhalben ackere artlandis gelegen in den felden zcu Blanckinberg unde nemlich gelegen zcu dem Hoffelen vor zwelff pfunt pfenge. Und den obgenanten zcins sullen geben und reichin ewiclichin uff sente Michelis tag alle iar ierlichin dy nach geschriben lute: Dittrich Zcymmerman dry schillinge phenge unde eyn hun, Dittrich Burghard dry schillinge pfenge, Dittrich Lonis dry schillinge pfenge und eyn hun, Hans Pruntzilen dry schillinge unde eyn hun, Conrad Strouwiln dry schillinge pfenge und eyn hun, Dittrich Otten dry schillinge und eyn hun unde alle yre erben odir wer dy gut besiczen. Und ich Else von Holbach und Ailheid obgenante sint zcu rate worden mid wol bedachten mute und gunst unsis herren des aptis und bekennen in disem briff, das wir haben gegeben und geben den obgenanten zcins zcu eyme selegerete zcu herne Petirs von Erforte altare, dem god gnad, unde zcu eyme ewigen gedechnisse unser vorvaren und unser sele selickeit und durch merunge gotis dinste und sundirlich, das wir teilhaft werden allir guten werck, dy zcu desem selben obgenanten altare gesehen. Und wir Conrad apt und unse sampnunge obgenant eygen desen obgenanten zcins zcu disem selben altare, alse eygens recht ist, nu und ewiclichin. Des zcu eyme bekentnisse und sichirheit habe wir aptie unsere und unsere sampnunge ingesegelen an disen briff gehangen.