Wir Cunrad von Ischerstete, von gotis gnadin apt zu der Paulinen Celle, und dy gancze samenunge da selbins bekennen uffinlich an | desme uffin brife vor allen den dy en sehn, horn odir lezin, daz wir myt gutyn vor rate und mit wolbedachtin mute egin und | geeygint haben vor uns und alle unsir nachkomelinge alle dy cinse, dy her Petir von Erforte, unsir metebrudir, gekouft und | gezugit hat, zu deme altare, der da gewit ist in sende Elizabethin ere der heylgin vrouwin und zu deme ewigin lichte, daz da bornit vor dem heilgin cruce in deme monstere. Dy zcinse sind gelegin: dru phunt zu Remde in der stad, eyn virdung zu Schobelick, sebin schillinge zu Rotinbech an der mol, vyr phunt und achtehalben schillinge zu Blanckinberg und zu Nuwindorf odir wo so da umme legin odir gelegin sindt nach syner brife lute und vir phunt an Peczolde von Grysheim zu Grefinouwe, dy man wedir mack lozin vor vircz phunt phenge. Were och daz dy lozunge gesche, welchis iaris daz were, so sal man dy vircz phunt phenge wedir an ewige zcinse legyn und koufin und dy zcinse soln deme altare volgin und deme lichte, alzo hy vore beschrebin sted. Och eygin wir achzcen schillinge phenge und vunf hunre gelegin zu Blanckinberg, dy da zu gegeben habin dy geistlichin iuncfrouwin von Holbach und eyn phunt geldes daz zu Blanckinberg daz da sted acht phunt phenge daz da gegebin habin dy geistlichin iuncfrouwin genant gemechlich zu eyme ewigin selgerete und gedecknisze. Were och daz daz phunt geldis abegelozt worde, so sal man dy acht phunt wedir an zcinse legin, glicher wis alzo daz gelt Peczoldis von Grisheim. Och bekenne wir obgnantir Cunrad apt, daz wir eygin und geeygint haben zcehn phunt und acht schillinge phenge ewigis zcinsis gelegin in dorf und in velde zu Wulferichshusin den zcins man unweit merme iar teyln sal hern Schullern und iuncfrouwin zu eyme ewigin selgerete und gedechnisze, hern Petirs sele zu troste und zu hülfe und allen synen eldirn selyn. Dez selbin zcinses sal man den hern gebin in deme cavent sebin phunt, den Schullirn acht schillinge und den clostirfrouwin dru phunt. Och vor zcy wir uns und alle unse nachkomelinge uns allir ansprache, wy man dy erdenckin mogte, an den vorgnantin zcinse ewiclich ane argelist. Daz alle deze vor und nach geschreben rede, stucke und artickel stete und gancz von uns und von allen unsen nachkomelingen stete und gancz und unvorbrochlichin gehaldin werdin, dez habe wir obgnantir Cunrad von Ischerstete apt und dy samenunge unser ingesegelle wissentlich an dezin offin brif lazin henge.