Wir Friderich von gotis gnaden lantgrave in Doringen, marggrave zcu Miessin und phalczgrave zcu Sachsen, der iunger, bekennen | und thun kund uffintlichin mid dießem brieve vor uns und unser erbin, als die gestrengen Albrecht und Reynhard von Liechtenberg | gebrudere unser lieben getruwen uff eynen widerkouff vorkoufft habin sieben hufen landes in dem felde zcu Elxleibin gelegin und | von uns zcu lehen gehen den erbern herren den vicarien gemeynlichin unser lieben vrouwen kirchen zcu Erfforte vor hundert rinsche gulden und uns mid vließe gebeten yn des zcu gunnen und unsen willin darczu zcu gebin, wann yn des iczund noyt sy von schulde wegin, damite sie uberfallen sin, das wir also umb irer demutigen vliessigen bethe willin zcu solichem kouffe unser gunst, willin und vorhengkeniße gegebin und den genanten vicarien zcu Erfforte der vorgeschriben sieben hufen landes uff eynen widerkouff bekandt habin und bekennen geinwertiglichin in dießem brieve vor hundert rinsche gulden als vorgerurt ist ane geverde, doch also daz dii vorgenanten Albrecht und Reinhard von Liechtenberg ader ire erbin die egenanten sieben hufen landes weder koyffen und zcu yn brengen sollin vor hundert rinsche gulden bynnen drien iaren dii nest nacheynander volgen nach gebunge dießes brieves, als sie uns daz geredt, globet und in irem uffin brieve vorschriben habin ane allen vorczog, hinderniße und geverde. Des zcu orkunde und bekenteniße habin wir Friderich unser ingesigel wissintlichin an dießen brieff lassen hengen. Hie bii sind gewest und geczügen die gestrengen unser heymelichin und lieben getruwen er Friczsche von Wangeheym, er Ditherich von Wiczeleibin rittere und ander erber lute gnug.