Wir Gunther von gotis gnadin apt zcu der Paulin Celle bekennen uffenlichin an dysme keynwer|dygen briefe, daz Nycolaus Petzcold und alle sin erbin vorkouft habin recht und redelichin | den geystlichin hern unsin hern hern Hartung dem prior und der sammenunge gemeyn dez vorge|nanten closters zcwelf Schillinge pheing geyldis genge und gebe ierlingis zins alle iar uf sente Michels tag von anderhalbme agker und von eyme hophgarten, dy da zcu Blankenburg in der Warfe gelegen sint, umme vier phunt Erfortzer pheynge, dy se eme gutlichin und liplichin gegebin und bezcald habin. Dar obir tun unse hern der prior und der cavent Nycolaus Petzcolde und den vorkoufern dy fruntschaf und gunst, daz se den zcins sullen wedir koufen umme daz selbe geld und were in den vier heylgen tayn zcu wynachten, wel zcit se daz wollin odir mogin getu. Wan se dez nicht enteten, so sal der zcins den vorgenanten hern her vallen sy uf sente Michels tag ane argelist. Dez sint gezcuge dy bescheyden lute Conrad Hepe, Conrad Gotzce, burger zcu Blankenburg, Conrad Hetzcel von Kongysse. Und wir vorgenante apt Gunther dorch bete willen der koufer und vorkoufern habin unse insigele an desen brief gehenget.