Wir Gunther von gotis gnadin apt zcu der Paulin Celle bekennen an dysme uffin briefe, daz der | bescheyden man Albrecht von Golys, burger zcu Blankenburg, had vorkouft recht und redelichin den | wysen und den geystlichin hern hern Hartung dem prior und dem cavent gemeyne zcu der Celle unsis | vorgenanten closters eyn phunt pheynge ierlichs cins uf sente Michels tag zcu gebene, dez zcins gebyt Reynhart Rote zcu Swartzca V Schillinge und eyn hun von eyner wesen, Ditherich Zcinke xviii pheynge von eyme garten, Heynrich Sperling XVIII pheynge von eyme garten, Hartman Schuler zcu Blankenburg V Schillinge phenge und eyn hun von eyme acker hophgarten, Nyclaus Mezzerer III Schillinge von eyme garten, Bertold Hesker V Schillinge und zcwey hunre von eyme acker hophgarten, ewiclichin zcu habene und zcu besytzcene umme zcen phunt pheynge gebe und genge, dy se eme und sin erbin gutlichin und gentzlichin bezcald haben. Och ist da geret, daz der vorgenante Albrecht von Golys adir sin erbin den zcins sal sammene und unsen hern zcu hophe antwerte in unse closter und wer, daz deme zinse adir den guten icht abe ginge, daz sal der egenante Albrecht adir sin erbin her vulle met andern sin guten, da der zcins in gehoret an allirleyge argelist und wederrede. Daz phunt geyldis hunre geyld hat Albrecht von Golys und alle sin erbin den vorgenanten unsin hern und der sammenunge gemeyn uf gelassin von uns und han sich vor zcegen met alme rechte und artikeln, da mete der kouf gehindert mochte werde. Dez sint gezeuge dy bescheyden lute Herman Schriber und sin son, Conrad Hepe, burger zcu Blankenburg. Dar obir gebe wir en desen brief vor segeld met unsme insegele.