Wir Gunther van gotes gnaden grafe und herre zcu Swartzburg bekennen offelich an | disem geynwertigen brife . ., daz der ewerdige vater in gote Gunther apt in der Celle sente Pau|linen unde die samenunge da selbens offe eyne siten unde Otto, ern Hermans san, van Grizheym, | des Geylsdorf was, den got gnade, zcu uns gegangen haben umme alle uflöfte, di si geyn eynander gehat haben umme di gut zcu Elchleyben, des sint vir unde zcwenzcik maz korns unde gersten ilmenischez gemezis unde der ofeley der dar zcu gehort. Nu scheyde wir si also . ., | daz daz selbe getreyde unde ofeley bi deme goteshus sal ewiclich bliben unde daz sal der vorgenante Otto van Grizheym geyn unsenn ohmen van Kefernburg aller sache entwerren. Ouch sal der apt des vorgenanten Otten bruder töchtere zcwu in nemen, di do heyzen Aleyt unde Thele unde den zcwu phrunde geben unde dar zcu daz dinst. Daz alle di vorgeschreben sache stete unde gantz unforbröchlich gehalden werden, des habe wir grafe Gunther vorgenant unsir insigel an disen offen brif zcu eynen waren orkvnde gehenget.