Nos frater Iohannes dei et apostolice sedis gracia episcopus Yponensis vicarius in partibus reverendissimi in | Christo patris ac domini domini Ludouici archiepiscopi Maguntine ecclesie universis Christi fidelibus, ad quos presentes | pervenerint, salutem in domino sempiternam. Cupientes Christi fideles ad pietatis opera modis conve|nientibus et deo placitis invitare omnibus vere penitentibus et confessis, qui ad monasterium in Paulinen Celle seu pro fabrica ibidem manus porrexerint adiutrices et qui in festivitatibus nativitatis Christi, pasche, ascensionis, penthecostes, corporis Christi, dedicacionis, quam quidem dedicacionem transtulimus et transferimus in proximam dominicam ante Petri et Pauli apostolorum per presentes, et in festivitatibus virginis gloriose, omnium apostolorum, patronorum, omnium sanctorum nec non et in die omnium animarum causa devocionis predictum monasterium accesserint ibique orando septem pater noster et septem ave Maria et qui in serotina pulsacione ob reverenciam virginis gloriose tria ave Maria dixerint, nos de omnipotentis dei misericordia beatorum Petri et Pauli apostolorum gracia confisi auctoritate qua fungimur de iniunctis eis penitenciis quadraginta dies criminalium et unum annum venialium indulgenciarum et unam karenam in domino misericorditer relaxamus.