Wir grefe Heinrich von Swarczpurg, herre zu Blankenberg, bekennen ufflichin an disem kegenwertigen brife und alle un|se erben alle den, dy en seen, horen eder lesen, daz wir dorch sunderlicher biete willen des erbern knechtis Rudolfes | von Yscherstete lihen unde bekennen eynes ewigen koufes virdehalbis ackers winwachses gelegen zu Blankenberg, | daz da heyzit in deme vorwerke, deme geystlichin manne hern Cunraden von Yscherstete, apte zu der Paulincelle, unde der ganzen sammenunge gemeyne alda selbins, dy sie eme abe gekouft haben recht unde redelichen vor syebinczig phunt phenninge erfortischer were, dye sie eme genzlichen unde gutlichen beczalt haben unde he dye in sinen nucz unde fromen hat gewant. Ouch bekenne wir egnanten grefe Heinrich von Swarczpurg, daz dy egnanten koufere tun solche gunst unde fruntschaft dem vorgescreben Rudolfe von Yscherstete unde sinem brudere unde eren rechten erben, daz sie den vorgescreben wingarten mogen weder koufen umme sodan summen geldes als hy vor gescreben stet, wan en daz fugsam ist. Daz alle dyse vor unde nach gescreben rede, stucke unde artikel stete unde ganz gehalden werden, des zu eyner sycherheyt habe wir vorgescreben grefe Heinrich von Swarczpurg herre zu Blankenberg dorch bete willen Rudolfes von Yscherstete unse insigil mit wißen unde guten willen an dysen brif gehangen.